Ogia antzinako janari ezagun eta ohikoenetako bat da; azken urteotan, aldiz, ospe txarra hartu du. Ogi industrialaren kalitate txarrak eta etiketatze argia ez erabiltzeak nahasmena sortu du kontsumitzaileen artean. Nola jakin jaten dugun ogia osasuntsua den ala ez? Orain, “ogiaren lege berriak” osasuntsuena eta zaporetsuena aukeratzen lagunduko digu.
Araudi berria iruzurrak ekiditeko
Gaur egun jaten dugun ogiak ez du gure aiton-amonek jaten zutenaren antza handirik. Industria produktuen gorakadak orotariko ogiak ekarri ditu dendetara, baina etiketak ez dira batere argiak ezta fidagarriak ere; integrala ez zen ogia integral gisa saldu zitekeen.
Uztailetik aurrera, Dekretu Lege berriak amaiera eman nahi dio iruzur horri, engainuak ekiditeko eta benetan kalitate oneko ogia aldarrikatzeko, hura baita dieta orekatu eta osasuntsuan sartu beharko genukeena.
Nola bereizi ogirik onena
- Ogi integrala. Orain arte integral faltsuak saldu zitezkeen, zeinak irin integralen portzentaje txiki bat baino ez zuten edo zeinei zahia gehitzen zitzaien, baina hemendik aurrera ezingo da hori egin. Orain, % 100 irin integralari baino ezingo zaio deitu integrala. Benetako integral honek zuntz ugari du eta, ondorioz, gehiago asetzen du.
- Zereal anitzeko ogia. Orain ogiak dituen irin desberdinen kantitate zehatza irakurri ahal izango duzu etiketetan. Hala, garia, espelta, zikirioa, kinoa, artoa… duten ogien artean aukeratu ahal izango duzu, zeinak elikagai gehiago dituzten.
- Ore ama. Ore amaz egindako ogia osasuntsuagoa eta zaporetsuagoa da, eta denbora gehiagoz irauten du bigun. Honek ezin du eduki % 0,2 baino gehiago industria-legamia eta, gutxienez, 15 orduz utzi beharra dago harrotzen. Ondorioz, digestioari laguntzen dio.
- Benetako artisau-ogia. Ogi horiek egiteko orduan giza faktorea eta eskuzkoa izan behar du nagusi, hau da, benetako artisau-balioa berreskuratuko da.
- Gatz gutxikoa. Erabili daitekeen gatz kopurua ere murriztu da, oro har, konturatu gabe bada ere, gatz gehiegi sartzen baitugu dietan, produktu prozesatuen bitartez.
Ogiaren balioa dieta osasuntsuan
Ogia dieta mediterraneoaren atal bat da, eta elikadura orekatuan sar daiteke barietate osasuntsuak aukeratuz gero, eta haien kontsumoa beharren neurrikoa bada, gehiegi jan gabe. Zalantzarik al duzu ogia modu osasuntsuan jaten jarraitzeko moduaren inguruan? Dieta planifikatzeko laguntza behar baduzu, gogoan izan Lur Garmendia Kontsultan adituak garela elikagaian eta profesionalen gure taldeak zure neurrirako aholkularitza emango dizula zure helburuak lortzeko.
